Арал ауданына қарасты Сексеуіл кентінде «Құмсай» бөгетінің тең жартысын су шайып кеткен, деп хабарлайды «Азаттық-Ньюс» Ақпараттық агенттігі.

«Құмсай» су қоймасы Сексеуіл кентінен 2 шақырым қашықтықта орналасқан. Қазіргі таңда жауын-шашынның және еріген қар суының мол жиналуынан бөгеттің бір бөлігін су шайып, Тербенбес қырқасының жанындағы сайға су ағуда.

Бұдан бөлек, «Бозой-Шымкент» газ құбырына қызмет көрсететін техникалық жолды су шаюы салдарынан Ақеспе елді мекені халқының жол қатынасына қиындық тудыруда. Осы ретте, табиғи құбылыс салдарынан уақытша орын алған жағдай шенеуніктермен ауыл тұрғындарына түсіндірілді.

Осыған байланысты аудан басшысы тиісті мекемелер мен жауапты сала басшыларына мәселені қатаң бақылауда ұстап, дер кезінде қалпына келтіру жұмыстарын жүргізуді тапсырды.