Қызылорда қаласының аумағында 11–16 шілде аралығында «Қауіпсіз жол» атты жедел-профилактикалық іс-шарасы өткізілуде. Аталған шараның негізгі мақсаты – жол-көлік оқиғаларының алдын алу, жол қозғалысы ережелерінің сақталуын қамтамасыз ету, құқық бұзушылықтардың жолын кесу және барлық жол қозғалысына қатысушылардың қауіпсіздігін арттыру.
Жол қауіпсіздігі – қоғамның ортақ жауапкершілігі. Жол-көлік оқиғаларының басым бөлігі жүргізушілердің жылдамдық режимін сақтамауы, мас күйінде көлік басқаруы, қарсы бағытқа шығуы, бағдаршам талаптарын елемеуі және жаяу жүргіншілердің белгіленбеген жерден жолды кесіп өтуі сияқты ереже бұзушылықтардың салдарынан орын алады. Сондықтан мұндай профилактикалық іс-шаралардың басты мақсаты – құқық бұзушыларды анықтап, жауапкершілікке тартумен қатар, азаматтардың құқықтық мәдениетін қалыптастыру және жол қозғалысы мәдениетін арттыру.
Іс-шара барысында полиция қызметкерлері қала аумағындағы жолдарда бақылауды күшейтіп, тәулік бойы рейдтік іс-шаралар ұйымдастырады. Әсіресе адам өмірі мен денсаулығына қауіп төндіретін өрескел құқық бұзушылықтарға ерекше назар аударылады. Атап айтқанда:
көлік құралын алкогольдік немесе есірткілік масаң күйде басқару;
белгіленген жылдамдықты асыру;
қарсы қозғалыс жолағына заңсыз шығу;
қауіпсіздік белдігін тақпау;
көлік құралын басқару кезінде ұялы телефон пайдалану;
жаяу жүргіншілерге жол бермеу;
балаларды тасымалдау қағидаларын бұзу;
техникалық талаптарға сәйкес келмейтін көлік құралдарын пайдалану сияқты құқық бұзушылықтарды анықтау және олардың жолын кесу бойынша жұмыстар жүргізіледі.
Сонымен қатар полиция қызметкерлері жүргізушілермен және жаяу жүргіншілермен профилактикалық әңгімелер өткізіп, жол қозғалысы ережелерін сақтау қажеттілігі жөнінде түсіндіру жұмыстарын жүргізеді. Мұндай кездесулердің басты мақсаты – азаматтардың жауапкершілігін арттыру, жолдағы тәртіпті нығайту және қайғылы жағдайлардың алдын алу.
Жолдағы әрбір әрекет адамның өміріне әсер етуі мүмкін. Сондықтан жүргізушілерден көлік жүргізу кезінде мұқият болып, белгіленген жылдамдық режимін сақтауды, қауіпсіздік белдігін тағуды, жаяу жүргіншілерге құрметпен қарауды және жол белгілері мен бағдаршам талаптарын қатаң орындауды сұраймыз. Ал жаяу жүргіншілер тек арнайы өткелдер арқылы өтіп, жолға шығар алдында көлік қозғалысының қауіпсіз екеніне көз жеткізуі қажет.
Құрметті қала тұрғындары мен қонақтары!
Жол қозғалысы ережелерін сақтау – заң талабы ғана емес, әрбір азаматтың өмірі мен денсаулығына деген жауапкершілігінің көрінісі. Өзара сыйластық пен тәртіпті сақтау арқылы ғана жол-көлік оқиғаларының алдын алып, қауіпсіз орта қалыптастыра аламыз.
Әрбір жүргізуші мен жаяу жүргіншіні жол қозғалысы ережелерін қатаң сақтауға, өз өміріне және айналасындағылардың қауіпсіздігіне бейжай қарамауға шақырамыз.
Қызылорда қаласы Полиция басқармасы