Елімізде жол қозғалысы қауіпсіздігін қамтамасыз ету, жол-көлік оқиғаларының алдын алу және жол қозғалысы ережелерін сақтау мәдениетін қалыптастыру мақсатында өткізілетін «Қауіпсіз жол» жедел-профилактикалық іс-шарасы өз жалғасын табуда. Аталған іс-шара аясында құқық қорғау органдары қоғамдық қауіпсіздікті нығайтуға және азаматтардың өмірі мен денсаулығын қорғауға бағытталған кешенді жұмыстар жүргізуде.
Осыған орай, Сырдария ауданы полиция бөлімінің бастығы, полиция полковнигі Беркимбаев Максат Сүлейменұлы аудан тұрғындары мен қонақтарына үндеу жасап, жол қозғалысы ережелерін қатаң сақтаудың маңыздылығына тоқталды. Ол жол қауіпсіздігі – тек полиция қызметкерлерінің ғана емес, әрбір жол қозғалысына қатысушының ортақ жауапкершілігі екенін атап өтті.
Бүгінде жол-көлік оқиғаларының негізгі себептерінің бірі – жүргізушілер мен жаяу жүргіншілердің жол қозғалысы ережелерін сақтамауы. Атап айтқанда, жылдамдықты шамадан тыс арттыру, қарсы бағытқа шығу, мас күйінде көлік басқару, қауіпсіздік белдігін тақпау, жаяу жүргіншілердің белгіленбеген жерден жолды кесіп өтуі секілді құқық бұзушылықтар қайғылы жағдайларға алып келуде. Сондықтан әрбір азаматтың жолдағы тәртіп пен жауапкершілікке ерекше мән беруі аса маңызды.
Іс-шара барысында полиция полковнигі Беркимбаев Максат Сүлейменұлы жеке құрам қызметкерлерімен нұсқаулық жиын өткізіп, қоғамдық тәртіпті сақтау мен жол қозғалысы қауіпсіздігін қамтамасыз ету бағытындағы міндеттерді нақтылады. Жиында жол-көлік оқиғаларының алдын алу, жол қозғалысы ережелерін өрескел бұзу деректерін анықтау, құқық бұзушылықтарға дер кезінде ден қою және профилактикалық жұмыстарды күшейту мәселелері жан-жақты талқыланды.
Сонымен қатар, полиция қызметкерлеріне қызметтік міндеттерін адал атқару, азаматтармен сыпайы әрі заң талаптарына сәйкес қарым-қатынас жасау, жол қозғалысына қатысушылар арасында түсіндіру жұмыстарын тұрақты жүргізу жөнінде нақты тапсырмалар берілді. Жедел-профилактикалық іс-шара аясында аудан аумағында рейдтік жұмыстар күшейтіліп, жол қауіпсіздігін қамтамасыз ету бойынша кешенді шаралар жүзеге асырылуда.
«Қауіпсіз жол» іс-шарасының басты мақсаты – құқық бұзушылықтарды анықтап қана қоймай, олардың алдын алу, азаматтардың құқықтық мәдениетін арттыру және жолдағы қауіпсіздікті қамтамасыз ету. Себебі жол ережелерін сақтау – әрбір адамның өмірі мен денсаулығын сақтаудың ең тиімді жолы.
Сырдария ауданы полиция бөлімі аудан тұрғындары мен қонақтарын жол қозғалысы ережелерін қатаң сақтауға шақырады. Көлік құралын басқару кезінде жылдамдық режимін сақтау, қауіпсіздік белдігін тағу, мас күйінде көлік тізгініне отырмау және жаяу жүргіншілерге құрметпен қарау – ортақ қауіпсіздіктің кепілі.
Жолдағы тәртіп – қоғам қауіпсіздігінің айнасы. Әрбір азамат жол қозғалысы ережелерін сақтай отырып, өз өмірін ғана емес, өзгенің де өмірін қорғауға үлес қосады. «Қауіпсіз жол» – баршамыздың ортақ міндетіміз және адам өмірінің басты кепілі.
Бұл мақаламен бөлісу
Пікір қалдыру
Пікір қалдыру