Ағымдағы жылдың 18 мамыры мен 8 маусымы аралығында республика көлемінде өткізіліп жатқан «Зорлық-зомбылықсыз Қазақстан» акциясы аясында Сырдария ауданы полиция бөлімінің Қоғамдық қауіпсіздік бөлімшесінің Отбасылық-тұрмыстық зорлық-зомбылыққа қарсы күрес тобының инспекторы, полиция аға лейтенанты А. Рсымова Сырдария ауданының спорт саласында қызмет ететін жастарымен кездесу өткізді.
Кездесудің негізгі мақсаты – жастар арасында құқықтық сауаттылықты арттыру, зорлық-зомбылықтың алдын алу, қоғамдағы құқық бұзушылықтардың алдын алу және қауіпсіз мінез-құлық мәдениетін қалыптастыру болды.
Іс-шара барысында полиция қызметкері қатысушыларға тұрмыстық зорлық-зомбылықтың түрлері, оның зардаптары мен заң алдындағы жауапкершілігі туралы жан-жақты ақпарат берді. Сонымен қатар отбасындағы өзара сыйластық пен түсіністіктің маңыздылығы, кез келген зорлық-зомбылық әрекетіне төзбеушілік қағидаттарын ұстану қажеттігі түсіндірілді.
Кездесу барысында соңғы уақытта қоғамда өзекті мәселелердің біріне айналған буллинг пен кибербуллинг тақырыптарына ерекше назар аударылды. Жастарға буллингтің психологиялық және әлеуметтік салдары түсіндіріліп, мұндай жағдайларға тап болған кезде қандай шаралар қабылдау керектігі айтылды. Сондай-ақ әлеуметтік желілерде қауіпсіздікті сақтау, жеке мәліметтерді қорғау және интернет кеңістігіндегі мәдениетті қарым-қатынас қағидалары түсіндірілді.
Бұдан бөлек, қатысушыларға сталкингтің (қудалау мен аңду әрекеттерінің) белгілері, оның адам өміріне тигізетін кері әсері және мұндай құқыққа қайшы әрекеттер үшін қарастырылған жауапкершілік туралы кеңінен мәлімет берілді. Жастарға өз құқықтарын қорғау жолдары мен құқық қорғау органдарына жүгіну тәртібі түсіндірілді.
Кездесу аясында интернет-алаяқтықтың алдын алу мәселелері де қозғалды. Полиция қызметкері алаяқтардың қазіргі уақытта қолданатын түрлі айла-тәсілдері туралы айтып, жалған қоңырауларға, күмәнді сілтемелерге, әлеуметтік желілер мен мессенджерлер арқылы келетін күмәнді хабарламаларға сақ болуға шақырды. Сонымен қатар банк карталарының деректерін бөгде адамдарға бермеу және қаржылық қауіпсіздік талаптарын сақтау жөнінде нақты ұсыныстар берілді.
Іс-шара соңында жастар өздерін қызықтырған сұрақтарын қойып, құқықтық мәселелер бойынша қажетті кеңестер алды. Мұндай профилактикалық кездесулер жастардың құқықтық мәдениетін қалыптастыруға, құқық бұзушылықтардың алдын алуға және қоғамда қауіпсіз әрі қолайлы орта қалыптастыруға бағытталған маңызды жұмыстардың бірі болып табылады.
«Зорлық-зомбылықсыз Қазақстан» акциясы аясындағы түсіндіру жұмыстары алдағы уақытта да жалғасып, тұрғындар арасында құқықтық түсіндіру және ақпараттандыру шаралары тұрақты түрде жүргізілетін болады.