Қызылорда қаласының Полиция басқармасы тұрғындар мен қала қонақтарына қоғамдық орындарда кездесетін күмәнді QR кодтарға қатысты маңызды ескерту жасады. Соңғы уақытта алаяқтар заманауи технологияларды пайдаланып, азаматтардың жеке деректері мен банк шоттарына қол жеткізу мақсатында жалған QR кодтарды түрлі орындарға жапсыру деректерінің жиілегені байқалады.
Мамандардың айтуынша, мұндай QR кодтар аялдамаларда, көше бағаналарында, жарнамалық тақталарда, тұрғын үйлердің кіреберістерінде, автотұрақтарда, тіпті төлем жасауға арналған ресми QR кодтардың үстіне жапсырылуы мүмкін. Азаматтар оларды сканерлеген кезде жалған сайттарға өтіп, өздерінің банк картасының мәліметтерін, жеке ақпараттарын немесе SMS арқылы келген растау кодтарын енгізіп қоюы ықтимал. Нәтижесінде алаяқтар азаматтардың есепшотындағы қаражатты заңсыз иемденуі мүмкін.
Осыған байланысты Қызылорда қаласының Полиция басқармасы тұрғындарды барынша сақ болуға шақырады.
Полиция келесі қауіпсіздік шараларын қатаң сақтауға кеңес береді:
Көшеде немесе қоғамдық орындарда кездескен шығу тегі белгісіз QR кодтарды сканерлемеңіз;
QR кодты сканерлегеннен кейін ашылған интернет-сайттың мекенжайын мұқият тексеріңіз. Егер сайттың атауы күмән тудырса немесе ресми ресурсқа ұқсамаса, оны бірден жабыңыз;
Ешқандай жағдайда банк картасының нөмірін, CVV кодын, интернет-банкинг құпиясөздерін, SMS арқылы келген бір реттік кодтарды және жеке деректеріңізді енгізбеңіз;
Тек мемлекеттік органдардың, банктердің және ресми ұйымдардың сенімді QR кодтарын пайдаланыңыз.
Құқық қорғау органдары күмәнді QR кодты байқасаңыз, оны сканерлеуге немесе басқа адамдарға ұсынуға болмайтынын ескертеді. Мұндай жағдайлар туралы дереу «102» арнасына немесе жақын жердегі полиция бөліміне хабарлау қажет.
Цифрлық технологиялардың дамуы алаяқтықтың жаңа түрлерінің пайда болуына жол ашып отыр. Сондықтан интернеттегі және қоғамдық орындардағы кез келген цифрлық сервисті пайдалану кезінде қырағылық таныту – әр азаматтың жеке қауіпсіздігін қамтамасыз етудің маңызды кепілі.
Қызылорда қаласының Полиция басқармасы тұрғындарды сақтық шараларын қатаң сақтауға шақырып, алаяқтардың арбауына түспеу үшін ақпараттық қауіпсіздік талаптарын әрдайым есте ұстауға үндейді.
Қауіпсіздік – өз қолыңызда!