Полиция мен халық байланысы нығая түсті.

Қоғамдық қауіпсіздікті қамтамасыз ету, құқық бұзушылықтардың алдын алу және мал ұрлығы фактілерін азайту мақсатында арнайы дөңгелек үстел ұйымдастырылды. Жиынға құқық қорғау органдарының өкілдері, жергілікті тұрғындар, ауыл ақсақалдары мен сала мамандары қатысып, өзекті мәселелерді ортаға салды.
Кездесу барысында соңғы уақытта орын алып отырған мал ұрлығы деректерінің себеп-салдары жан-жақты талқыланды. Қатысушылардың айтуынша, мұндай қылмыстардың орын алуына көбіне малды қараусыз жаю, қоршаулардың талапқа сай болмауы, малды сәйкестендіру жұмыстарының әлсіздігі және тұрғындардың күмәнді жағдайларға дер кезінде мән бермеуі себеп болып отыр. Осыған байланысты құқық қорғау саласының мамандары алдын алу шараларын күшейтудің маңыздылығын атап өтті.
Жиында мал иелеріне төрт түлікті бақылаусыз жібермеу, арнайы таңбалау мен сырғалау жұмыстарын уақытылы жүргізу, қора-жайлар мен шаруа қожалықтарына бейнебақылау құрылғыларын орнату жөнінде нақты ұсыныстар айтылды. Сондай-ақ бөтен көліктердің ауыл маңында күдік тудыратын әрекеттері немесе малға қатысты түсініксіз жағдайлар байқалған сәтте бірден тиісті органдарға хабарлау қажеттігі түсіндірілді.
Полиция бөлімінің өкілдері өз сөзінде мал ұрлығының алдын алу бағытында атқарылып жатқан профилактикалық жұмыстарға тоқталды. Атап айтқанда, рейдтік іс-шаралар, түсіндіру кездесулері, шаруа қожалықтарын аралау және тұрғындармен тұрақты байланыс орнату жұмыстары жүйелі түрде жүргізіліп жатқаны айтылды. Сонымен қатар азаматтарды заң талаптарын қатаң сақтауға және ортақ қауіпсіздік мәселесіне бейжай қарамауға шақырды.
Кездесу барысында тұрғындар да өз пікірлерін білдіріп, ауыл-аймақтағы қауіпсіздікті күшейту, түнгі бақылауды ұйымдастыру, көрші ауылдармен өзара ақпарат алмасуды жолға қою секілді ұсыныстарын жеткізді. Олар мал ұрлығының алдын алу тек құқық қорғау органдарының ғана емес, бүкіл қоғамның ортақ міндеті екенін атап өтті.
Іс-шара қорытындысында қатысушылар тарапынан бірқатар нақты ұсыныстар қабылданып, алдағы уақытта бірлескен жұмыстарды жандандыру, түсіндіру шараларын жиілету және қауіпсіздік тетіктерін күшейту жөнінде ортақ шешім қабылданды.