Құны 1,2 млрд теңге болатын ақбөкен мүйізін сақтағандар ұсталды
Жетісу облысында ақбөкен мүйізін заңсыз сақтаған күдікті қолға түсті, деп хабарлайды «Азаттық-Ньюс» Ақпараттық агенттігі.
ПД ұйымдасқан қылмысқа қарсы күрес, Шекара қызметі мен ҰҚК департаменті қызметкерлерінің жедел іздестіру жұмыстарының нәтижесінде 39 жастағы ер адам Жетісу облысы, Панфилов ауданының маңайында ұсталған.
ПД бастығының орынбасары Елдар Абдикеновтың мәлімдеуінше, тінту кезінде үйдің шатырынан скочпен оралған 7 картон қорап табылған. Оның ішінде 464 дана ақбөкен мүйізі шыққан.
Табылған мүйіздерге сот-биологиялық сараптама тағайындалды. Нәтижесінде, мемлекетке келтірген шығын 1 млрд 284 816 000 теңгені құраған.
Бүгінде сотқа дейінгі тергеу жалғасуда, істің мән-жайы зерттеліп жатыр.