Сыр өңірінде аязбен қоса жел де күшейіп тұр. Дауылдың қаттылығы соншалық нысандардың жабындылары шыдас бермей жатыр, деп хабарлайды «Азаттық-Ньюс» Ақпараттық агенттігі.

Шиелі ауданына қарасты Қосүйіңкі ауылында мектептің, ал Қызылорда қаласында әскери бөлімнің шатырлары ұшып кетті.

Одан бөлек шаһардағы екі көпқабатты үйдің және екі кәсіпкерлік нысанның қаптамалары желге шыдас бермеді. Салдарынан Қызылордада пәтерлерге беріліп отырған жылудың қысымы да түсіп көрінеді. Шенеуніктер қазір осындай үйлерді анықтап, ақауларды жоюға жұмыс жасап жатыр.

– Қала әкімінің бастаған жұмыс тобымен қаланы 5 аймаққа бөліп алып, аралау жұмыстарын жүргіздік. Енді жылудың шығысы есептеліп отыр, 70-75 градус, ал кірісі 50-52 градусқа кіріс болып тұр. Сол себепті тұрғындардың үйлеріне де барып көріп жатырмыз. – дейді ҒАЛЫМЖАН ЕРКЕБАЙ, ҚЫЗЫЛОРДА ҚАЛАСЫ ӘКІМІНІҢ ОРЫНБАСАРЫ.