Жалағаш ауданына қарасты Жаңадария ауылының басшысы өзіне және қызметкерлеріне артық жалақы төлетіп, мемлекетке 2 млн теңгедей шығын келтірген, деп хабарлайды “Azattyq-News”  Ақпараттық агенттігі.

Бұл заң бұзушылық туралы мемлекеттік қызмет істер агенттігінің өкілдері айтып отыр. Бірақ сөйте тұра, әкім де, қызметкерлерде қылмыстық жауапкершілікке тартылмаған. Агенттіке қарасты департамент басшысының айтуынша, әкім Асхат Есқалиев жұмыс істемеген уақытына артығымен ақша алған. Заңсыз алынған жалақысы 400 мың теңгедей болыпты. Сондай-ақ ауыл әкімдігінің қызметкерлері де бюджеттен жүйелі түрде артық айлық алып келген. Бірақ келтірілген шығынды толықтай өтепті. Алайда заңбұзушылыққа барғаны үшін тек қызметінен ғана босатылатын болыпты.

“Өткен жылы да, биыл да осындай заң бұзушылықтар анықталған. Әкім мұны мен жасаған жоқпын,  эцқ-ні есепшіге беріп қойғанмын деген уәж айтты. Бірақ оның өзі заңбұзушылық болып табылады. Ал тексеру комиссиясы мұны құзырлы органдарға жолдаған. Олар қылмыстық белгі жоқ деген. Біз аудан әкімдігіне қызметінен босату туралы ұсыныс бердік”, –  дейді мемлекеттік істер агенттігінің департамент басшысы Ғалым Тұрсынбаев.

Сондай-ақ есепші өз қызметін әлі де жалғастырып жатыр. Ғалым Тұрсынбаевтың айтуынша, облыста әкімдердің өзіне заңсыз артық жалақы алып жүрген бірнеше дерегі анықталған.