Қызылорда облысында 2025 жылдың 12 шілдесінен бастап қоғамдық орындарда адамның бет-жүзін толықтай жабатын киімдерді киюге тыйым салынады. Бұл туралы қолданыстағы заңнама талаптарына сәйкес хабарланды.
Мамандардың айтуынша, аталған шектеу ең алдымен қоғамдық қауіпсіздікті күшейтуге бағытталған. Себебі бет-жүзді толық жабатын киімдер бейнебақылау камералары арқылы азаматтарды тануды қиындатады. Бұл өз кезегінде құқық қорғау органдарының жұмысын күрделендіріп, құқықбұзушылықтардың алдын алуға кедергі келтіруі мүмкін.
Сондай-ақ, кейбір жағдайларда қаскөйлер осындай киімдерді әдейі пайдаланып, ұрлық, тонау немесе алаяқтық сияқты заңға қайшы әрекеттер жасауы ықтимал екені айтылуда.
Дегенмен, заңда белгілі бір жағдайларда бет-жүзді жабуға рұқсат қарастырылған. Атап айтқанда, медициналық көрсетілімдер, ауа райының қолайсыздығы, спорттық немесе мәдени іс-шаралар кезінде, сондай-ақ мерекелік шараларда мұндай киімдерді пайдалануға болады. Сонымен қатар ұлттық және діни киімдерге де рұқсат берілген, алайда бұл жағдайда адамның беті ашық болуы тиіс.
Жергілікті билік өкілдері тұрғындарды жаңа талаптарды түсіністікпен қабылдап, заң нормаларын сақтауға шақырады. Олардың сөзінше, қоғамдық тәртіп пен қауіпсіздікті қамтамасыз ету — әр азаматтың ортақ міндеті.
Бұл мақаламен бөлісу
Пікір қалдыру
Пікір қалдыру