2025 жылы әлеуметтік төлемдер өседі - экономика министрі
2025 жылы әлеуметтік төлемдер өседі, деп хабарлайды «Азаттық-Ньюс» Ақпараттық агенттігі.
Ұлттық экономика министрі Нұрлан Байбазаров келер жылдан бастап әлеуметтік төлемдер қаншаға өсетінін мәлімдеді.
Министрдің сөзінше, 2025 жылғы 1 қаңтардан бастап ортақ зейнетақы 8,5%-ға, әлеуметтік жәрдемақылар мен базалық зейнетақы 6,5% индекстеледі.
«Балалы отбасыларға арналған жәрдемақыларды төлеуге 2025 жылға арналған республикалық бюджетте 875,1 млрд теңге қарастырылған. Тұрмысы төмен азаматтарды әлеуметтік қолдау атаулы әлеуметтік көмек көрсету арқылы жалғасады», — деп атап өтті Нұрлан Байбазаров.
Оның айтуынша 2023 жылдың 1 қарашасындағы жағдай бойынша 76 мың отбасы немесе 403 мың адам АӘК алды.
2024 жылдың 1 қыркүйегінен бастап Қазақстанда стипендия көлемі: бакалавриат бойынша 20%-ға, магистранттар мен докторанттарға 15%-ға өсті.
Ғылыми ұйымдар қызметкерлерінің жалақысы 18%-ға артты, 2025 жылдан бастап 17%-ға көбейеді.
2025 жылға арналған республикалық бюджетте 42 түрлі әлеуметтік төлемдер бойынша 6 трлн теңгеден астам қаражат қарастырылған, бұл 2024 жылмен салыстырғанда 12,5%-ға көп.
Республикалық бюджеттен және Мемлекеттік әлеуметтік сақтандыру қорынан 2 млн-ға жуық қазақстандық отбасы жәрдемақы мен әлеуметтік төлем алады.