Қызылордада облыстық полиция департаментінің бастығы тағайындалды, деп хабарлайды “Азаттық-Ньюс” Ақпараттық агенттігі.

2023 жылдың мамыр айынан Қызылорда облыстық полиция департаментінің бастығы қызметін атқарған Аблазимов Махсудхан Нұғманұлы Ішкі істер министрінің бұйрығымен құрметті зейнет демалысына шықты.

Қызылорда облыстық полиция департаментінің жаңа бастығы болып Ергешов Серік Жүрсінбайұлы тағайындалды. Бұл туралы облыс әкімі Нұрлыбек Нәлібаев актив жиынынды мәлімдеді.

Ішкі істер органдары – қоғамда құқық тәртібін, азаматтардың қауіпсіздігін қамтамасыз ететін маңызды құрылымдардың бірі. Әсіресе, сақшылардың кәсіби қызметі – зор жауапкершілігімен, тәуекелшілдігімен, қиындыққа төтеп беретін төзімділігімен ерекше құнды әрі мәртебелі.

Бізге қоғам тыныштығын күзетіп, қиын жағдайда шұғыл әрі батыл шешім қабылдап, қызметтік парызын адал атқара алатын полиция қызметкерлері керек. Құқық қорғау органдарының жұмысын жүйелі әрі оңтайлы ету үшін әкімдік тұрақты қолдау көрсетіп келеді. Жауапкершілігі зор, күрделі салада Серік Жүрсінбайұлының білімі мен біліктілігі, кәсібилігі, пайымды басшылығы, жинақтаған мол тәжірибесі жетеді деп санаймыз, – деді Н.Нәлібаев.