Елімізде тұңғыш рет ҚР Ұлттық қауіпсіздік комитеті Төрағасының жүлдесіне арналған, еліміздің күштік құрылымдарымен арнаулы мемлекеттік органы қызметкерлерінің арасында қазақ күресінен «Ұлттық қауіпсіздік Барысы» республикалық жарысы өтеді, деп хабарлайды «Азаттық-Ньюс» Ақпараттық агенттігі.

Байрақты бәсекеге республикалық күштік құрылымдардан құралған 10 құрама команда қатыспақ. Бұл туралы Өңірлік коммуникациялар қызметі ұйымдастырған көшпелі брифингте Ұлттық қауіпсіздік комитетінің өкілі Арман Кенжебаев мәлімдеді.

– Бұл бәсеке ҚР Ұлттық қауіпсіздік комитеті мен ҚР Туризм және спорт министрлігімен және Қызылорда облысы әкімінің қолдауымен жүзеге асырылуда. Республикалық жарыс командалық есепте 66, 74, 82, 90, 100 келі салмақ бойынша өткізіледі. Сайыстың екінші бөлігінде 90 келі салмақтан жоғары спортшылар сынға түседі. Оған әр командадан 2 мықты спортшы шығады. Жеңімпазға “Ұлттық қауіпсіздік барысы” деген атақ беріледі. Жарысқа республикалық күштік құрылымдардан келген 50 спортшы қатысады, жас ерекшелігіне байланысты шектеу жоқ,- деді Арман Қаржаубайұлы.