Жамбыл облысында қазақ киносының күндері басталды, деп хабарлайды “Азаттық-Ньюс” Ақпараттық агенттігі.

Ұлттық киноны қолдау мемлекеттік орталығы еліміздің түкпір-түкпірінде Қазақ киносының онкүндігі шарасын жалғастыруда. Бүгін шара Жамбыл облысында мәдениет және тілдерді дамыту басқармасының қолдауымен өтті.

Тараз қалалық мәдениет үйінде ұйымдастырылған шарада Мәдениет және ақпарат министрлігінің, сондай-ақ Ұлттық кино орталығының қолдауымен түсірілген «Жамбыл. Жаңа дәуір» фильмі көрсетілді.

«Тарихыңды білмесең, келешекті болжай алмайсың» деген сөз бар. Біздің де Жамбыл облысында «Жамбыл. Жаңа дәуір» фильмін ұсынуымыз бекер емес. Биыл 6 жылдығын атап өткен Ұлттық кино орталығының негізгі миссиясы – өткеннен сыр тартып, осындай тарихи тұлғаларымыздың жарқын мұрасын жас ұрпаққа насихаттау.

Фильмнің аты айтып тұрғандай, қазақ ауыз әдебиетінің айтулы тұлғасы, жыр алыбы Жамбыл Жабаев туралы. Фильмде ақынның өміріне әсер еткен айтулы оқиғалар суреттелген. Атап айтқанда, ақындар слеті, ақын өлеңдерінің баспасөзде жариялануы. Сондай-ақ Жамбыл Жабаевтың Ораз Жандосовпен және басқа да көрнекті қайраткерлермен кездесуі көрсетіледі. Шара еліміздің өзге өңірлерінде де жалғасады. Біздің мақсат – ауыл-аймақтағы көрерменді отандық киномызбен, Орталықтың фильмдерімен таныстыру», – деді Ұлттық киноны қолдау орталығының Басқарма Төрағасы Құрманбек Жұмағали.

Тарихи байопиктің сценарисі әрі қоюшы-режиссері – Жандос Құсайынов. Шығармашылық топ туындыға кіріспес бұрын архивтерді ақтарғанын ескеру керек. Ол үшін тіпті Мәскеудегі мұрағаттар зерттелген.

Айта кетейік, бұған дейін Қазақ киносының онкүндігі Қарағанды облысында өтті. Бұл үрдіс жалғасып, еліміздің өзге қалалары мен ауылдық округтерінде де ұйымдастырылады. Бастама аясында ел тарихы мен мәдениетін айшықтайтын фильмдерді таныстыру жалғасады.

Мәселен, Кино күндері аясында көрсетілетін «Қажымұқан» ұлттық рухымызды асқақтатса, «Дос-Мұқасан» фильмі арқылы тұлғалардың жүріп өткен жолына қанығуға мүмкіндік беріледі. «Операция Набат», «Время патриотов» құқық қорғаушылардың еңбегін паш етіп, Отанға деген сүйіспеншілікті арттырады. «Бауырына салу» деп аталатын кинода ұлттық дәстүр дәріптеледі. Кішкентай көрермендерге арналған «Тайқазан» деп аталатын анимациялық фильм, «Алматы, я люблю тебя!», «Соңғы үкім», «Дала қасқыры», «Стоп, ночь» және «Шулама» фильмдерінің де айтар ойы бар.