Қатты дауыл 35 үйдің шатырын ұшырып әкеткен
Қатты дауылдың салдарынан тұрғын үйдің шатырына зақым келген, деп хабарлайды “Азаттық-Ньюс” Ақпараттық агенттігі “Мой Город” порталына сілтеме жасап.
Ақтөбе облысы, Ойыл ауданындағы Көсембай ауылында қатты дауыл көтерілген. 9 тамыз күні кешкі уақытта ауылдағы электр бағаналары құлап, шатырлар мен шарбақтар желмен ұшқан.
“Ауылдың астан-кестені шықты. Сиырлар мөңіреп, қойлар маңырап кетті. Мал далаға қашты. Бағаналар құлап, тас қараңғы болды. Абырой болғанда адамдар аман, жел басылғаннан кейін ер адамдар шығып, шатырларды көтеруге кірісті, астынан малды шығарды”, – дейді ауыл тұрғындары.
Облыстық әкімдік ұсынған мәліметке сенсек, Көсембай ауылында қатты дауылдың салдарынан 51 ғимараттың шатырына зақым келген. Соның ішінде 35 тұрғын үй бар. Қалғаны шаруашылық құрылыстар – қоралар және тағысын тағы. Жалпы, осы ауылда 74 үй бар. 380 адам тұрады.
Сол күні ауылда 9 электр бағанасы құлаған. Қазіргі кезде жетеуін көтеріп қойды. Барлық бағананы көтергеннен кейін электр қуатын береді. Шығынның көлемі әлі есептелген жоқ.
Көсембай ауылы аудан орталығынан 60 шақырым шалғай жерде орналасқан.