Арнайы жұмысшы топ санитариялық ахуалды тексерді
Аудан әкімі Айтбай Жандарбековтың тапсырмасына сәйкес, Шиелі ауданында «Таза Қазақстан» республикалық экологиялық акциясы аясында елді мекендерді абаттандыру және санитариялық тазалық жұмыстары тұрақты түрде бақылауға алынған, деп хабарлайды «Азаттық-Ньюс» Ақпараттық агенттігі.
Осы бағытта аудан әкімінің орынбасары Бағлан Сағындықовтың жетекшілігімен арнайы жұмысшы топ құрылып, ауылдық округтер мен кент ішінде санитариялық ахуалды зерделеу бойынша кезекті рейдтік шаралар жүргізілуде.
Аралау барысында рұқсатсыз төгілген тұрмыстық қалдықтарды жою, жасыл желектерді күтіп-баптау, жеке тұрғын үйлер мен кәсіпкерлік нысандарының маңайын абаттандыру, көше бойларын көгалдандыру, қасбеттердің сырт көрінісін ретке келтіру жұмыстары қатаң назарға алынды.
Меншік түріне қарамастан, барлық кәсіпкерлер мен тұрғындарға санитариялық талаптарды сақтау, өздеріне тиесілі аумақтарды таза әрі көрікті ұстау қажеттілігі ескертілді. Талаптарды орындамаған жағдайда ҚР заңнамасына сәйкес әкімшілік шаралар қабылданатыны түсіндірілді.
Айта кетейік, Қызылорда облыстық мәслихатының №112 шешімімен бекітілген абаттандыру қағидалары барша тұрғын үшін міндетті болып табылады. Қағидада аумақты таза ұстау, қасбеттерді ұқыптап күту, қоқыс шығарудың белгіленген тәртібі және қауіпсіздік талаптары нақты көрсетілген.
Тазалық – баршаға ортақ жауапкершілік. Бұл бағыттағы бақылау және ескерту жұмыстары алдағы уақытта да жалғасатын болады.