1 қазан – Халықаралық қарттар күніне орай әр ауданнан жиналған қазыналы қарттар қалада жаңадан бой көтерген нысандармен танысты, деп хабарлайды «Азаттық-Ньюс» Ақпараттық агенттігі.

Сапар барысында қариялар Бесарық ауылына да ат басын тіреді. Қарттардың құрметіне орай, бүгін Бесарықта жаңа өндіріс орындары мен сауда нысандары ашылды. Ел бастаған ақсақалдар халыққа қызмет етуді мақсат еткен кәсіпкерлерге ақ батасын беріп, ауылдың болашағы жарқын болсын деген тілектерін білдірді.

Айта кетейік, Бесарық ауылында “Абай-Дәулет” серіктестігінің бастамасымен фри зауыты ашылса, “Ауыл аманаты” жобасының негізінде наубайхана, кондитерлік және жартылай дайын өнім цехтары, пластик ыдыстар мен ағаш бұйымдары өндірістері өз жұмысын бастады. Бүгіннен бастап “Қызылорда” супермаркеті мен дәмхана да халыққа жоғары сапалы қызмет көрсетуге дайын.