Сырдария ауданында тұрғындардың қауіпсіздігін қамтамасыз ету бағытындағы профилактикалық жұмыстар қарқын алып келеді. Осы ретте Қалжан Ахун ауылында үйдегі өрт қауіпсіздігін сақтау бойынша түсіндіру шаралары жүргізіліп, жергілікті халыққа тұрмыста жиі кездесетін қауіптердің алдын алу жолдары жан-жақты түсіндірілді.
Жедел түрде ұйымдастырылған үгіт-насихат жұмыстары барысында төтенше жағдайлар бөлімінің мамандары әрбір отбасының қауіпсіздігі — өз қолында екенін атап өтті. Тұрғындарға электр құрылғыларын дұрыс пайдалану, олардың зақымданған сымдары мен ақауларын дер кезінде ауыстыру, тұрмыстық техниканы бір розеткаға шамадан тыс жалғамау сынды талаптардың маңызы түсіндірілді. Себебі мұндай қарапайым қағидаларды елемеу көптеген өрт оқиғаларына әкеліп соғатыны белгілі.
Сонымен қатар мамандар балалардың қауіпсіздігіне ерекше назар аудару қажеттігін алға тартты. Сіріңке, оттық, жанғыш заттардың балалардың қолы жетпейтін жерде сақталуы — әр ата-ананың басты жауапкершілігі екені айтылды. Көптеген өрт деректері балалардың отпен ойнауынан басталатынын ескерсек, бұл бағыттағы түсіндіру жұмыстарының өзектілігі жоғары.
Кездесу барысында тұрғындарға өрт шыққан жағдайда алғашқы әрекет қандай болуы тиіс екені де түсіндірілді. Ең алдымен оқиға орнынан балалар мен қарттарды қауіпсіз жерге шығару, қауіпті аумаққа өздігінен кірмеу және бірден 101 нөміріне хабарласу керектігі ескертілді. Жедел қоңырау — құтқарушылардың дер кезінде жетуіне мүмкіндік беретін ең маңызды қадам.
Сырдария ауданының Төтенше жағдайлар бөлімі өрт қауіпсіздігін сақтау – тек құтқарушы мамандардың емес, әрбір азаматтың ортақ міндеті екенін атап өтті. Халықпен тұрақты түсіндіру жұмыстары алдағы уақытта да жалғаса бермек. Бұл — адам өмірін, мүлікті және жалпы ауыл қауіпсіздігін сақтау жолындағы маңызды шаралардың бірі.
Сырдария ауданы ТЖБ