Қазақстанның эстрада жұлдызы Қайрат Нұртас кенже ұлы Ханның 11 жасқа толуына орай ерекше тарту жасады. Әнші ұлына автосалоннан су жаңа темір тұлпар алып бергені белгілі болды.
Бұл қуанышты хабарды Қайрат Нұртастың анасы әрі продюсері Гүлзира Айдарбекова Instagram желісінде жария етті. Ол немересінің жаңа көлік мінген сәтінен бейнежазба бөлісіп, көпшіліктен Ханды құттықтап қоюды сұраған.
«Біздің Хан енді өз көлігімен жүреді. Әке-шешесінің қолы босамайтындықтан, жүргізушісі таситын болады. Құттықтап қойыңыздар,» – деп жазды Гүлзира Айдарбекова.
Әлеуметтік желілерде де бұл жаңалық кеңінен тарап, туған күн иесін құттықтап, көрімдік ұсынған сәттердің видеолары жарияланды.
Журналистердің мәліметінше, Қайрат Нұртас ұлына Hyundai Palisade маркалы көлік сыйлаған. Қазақстан нарығындағы бұл автокөліктің бағасы шамамен 35-40 миллион теңге аралығында.
Желі қолданушылары жұлдызды әулеттің бұл сыйлығына түрлі пікір білдіріп, кейбірі «бұл — баласына деген әкенің қамқорлығы» десе, енді біреулері «әлі мектеп жасындағы балаға тым қымбат сыйлық» деп ойларын жеткізді.
Осылайша, Нұртастар әулетінде тағы бір ерекше қуаныш орын алып, халық арасында қызу талқыға түсті.