Ол зейнеткерлер мен жарымжан азаматтарға берілетін 32 млн теңгені қолды қылған. Онымен қатар қызметкерлеріне заңсыз төлем жасау арқылы да қомақты ақшаны қалтасына басып келген, деп хабарлайды “Азаттық-Ньюс” Ақпараттық агенттігі.

“Ұлытау облысы бойынша арнаулы әлеуметтік қызмет көрсету орталығының” бұрынғы директоры сотталды. Сотталушы қызмет барысында 29 азаматтың жәрдемақысы мен зейнетақысын жымқырған. Одан бөлек 4 жыл қатарынан өз қызметкерлеріне заңсыз ақша аударып отырған. Сол арқылы 12 млн теңгені қалтасына басқан. Экс-директор өз қылмысын толық мойындап, мемлекетке келтірген 44 млн теңге залалды қайтарып берген.

– Сот үкімімен ол кінәлі деп танылып, оған өмір бойына мемлекеттік қызметте, мемлекеттік органдарда және ведомстволарда лауазымдарды атқару құқығынан айыра отырып, 3 жыл 6 айға бас бостандығын шектеу жазасы тағайындалды, – деп мәлімдеді ҚР ҚАРЖЫ МОНИТОРИНГІ АГЕНТТІГІНІҢ БАСПАСӨЗ ҚЫЗМЕТІ.