Су айдындарында қауіпсіздік қағидаларын сақтау бойынша тұрғындар арасында түсіндіру-профилактикалық жұмыстар жүргізілді

Сырдария ауданында су айдындарындағы қауіпсіздікті қамтамасыз ету және қайғылы оқиғалардың алдын алу мақсатында ауқымды түсіндіру-профилактикалық жұмыстар тұрақты түрде жүргізілуде. Жаз мезгілінде тұрғындардың су жағалауларында демалуы мен шомылу маусымының қызу кезеңінде қауіпсіздік талаптарын сақтау аса маңызды.
Осыған орай, Сырдария ауданының төтенше жағдайлар бөлімінің қызметкерлері аудан аумағындағы өзен-көлдер мен су айдындары маңында тұрғындармен және демалушылармен профилактикалық жұмыстар жүргізді. Іс-шара барысында азаматтарға судағы қауіпсіздік ережелері кеңінен түсіндіріліп, арнайы жадынамалар таратылды.
Түсіндіру жұмыстары кезінде тұрғындарға тек арнайы рұқсат етілген орындарда шомылу, алкогольдік ішімдік ішкен күйде суға түспеу, балаларды қараусыз қалдырмау және тыйым салынған аумақтарда шомылмау қажеттігі ескертілді. Сондай-ақ, судағы төтенше жағдайлардың алдын алу мақсатында қауіпсіздік белгілеріне назар аудару және құтқару құралдарын пайдалану тәртібі түсіндірілді.
Мамандар әсіресе ата-аналарға балалардың қауіпсіздігіне ерекше көңіл бөлу керектігін атап өтті. Көп жағдайда жазатайым оқиғалар ересектердің немқұрайлылығы мен қарапайым қауіпсіздік талаптарын сақтамауынан орын алатыны айтылды.
Сырдария ауданының төтенше жағдайлар бөлімі тұрғындарды су айдындарында демалу кезінде өз өмірі мен жақындарының қауіпсіздігіне жауапкершілікпен қарауға шақырады. Қарапайым қауіпсіздік қағидаларын сақтау адам өмірін сақтап қалудың басты кепілі екенін естен шығармаған жөн.
Құрметті аудан тұрғындары! Су айдындарында демалу барысында қауіпсіздік ережелерін қатаң сақтап, өзіңіз бен жақындарыңыздың өміріне бейжай қарамаңыз. Сақтық – қауіптің алдын алудың ең тиімді жолы.