Қызылорда облысы Полиция департаменті бастығының орынбасары, полиция полковнигі Оралбек Тәубақабылұлы Омаровтың төрағалығымен Сырдария аудандық полиция бөлімінде 2026 жылдың бірінші жартыжылдығындағы жедел-қызметтік жұмыстың қорытындысына арналған жедел кеңес өтті. Маңызды жиынға аудандық полиция бөлімінің басшылығы мен жеке құрамы қатысып, атқарылған жұмыстардың нәтижесі жан-жақты сараланды.
Кеңес барысында аудан аумағындағы криминогендік ахуалға кешенді талдау жасалып, құқықтық тәртіп пен қоғамдық қауіпсіздікті қамтамасыз ету бағытында жүзеге асырылған шаралар кеңінен талқыланды. Сондай-ақ, қылмыстың алдын алу, құқық бұзушылықтарды болдырмау, қылмыстарды дер кезінде ашу көрсеткіштері мен жол қозғалысы қауіпсіздігін қамтамасыз ету саласындағы жұмыстардың тиімділігі қаралды.
Жиында қоғамдық тәртіпті нығайтуға бағытталған профилактикалық іс-шаралардың нәтижелері сараланып, тұрғындардың құқықтары мен заңды мүдделерін қорғау мәселелеріне ерекше назар аударылды. Азаматтардың қауіпсіздігін қамтамасыз ету, халықпен кері байланысты күшейту және полиция қызметінің ашықтығын арттыру бағытында қабылданған шаралардың маңыздылығы атап өтілді.
Полиция полковнигі Оралбек Омаров аудандық полиция бөлімінің қызметкерлеріне алдағы кезеңде атқарылатын міндеттерді нақтылап, қылмыстың алдын алу жұмыстарының сапасын арттыру, қоғамдық орындардағы қауіпсіздікті қамтамасыз ету, жол-көлік оқиғаларының алдын алу және тұрғындармен тиімді өзара іс-қимылды күшейту жөнінде бірқатар нақты тапсырмалар жүктеді.
Сонымен қатар, құқық қорғау органдары қызметінің негізгі мақсаты – азаматтардың конституциялық құқықтарын қорғау, заң үстемдігін қамтамасыз ету және қоғамның полицияға деген сенімін нығайту екендігі ерекше атап өтілді. Осы бағыттағы жұмыстарды жүйелі түрде жалғастырудың маңыздылығы айтылып, жеке құрамның кәсіби даярлығы мен қызметтік тәртібін күшейту мәселелері де күн тәртібінен тыс қалмады.
Жедел кеңестің қорытындысы бойынша Сырдария аудандық полиция бөліміне қоғамдық қауіпсіздікті қамтамасыз ету және құқық бұзушылықтардың алдын алу бағытындағы жұмысты одан әрі жетілдіру жөнінде нақты міндеттер қойылды. Құқық қорғау саласындағы қызметтің сапасын арттыру арқылы тұрғындардың тыныштығы мен қауіпсіздігін қамтамасыз ету – полиция қызметінің басты басымдығы болып қала бермек.
Бұл мақаламен бөлісу
Пікір қалдыру
Пікір қалдыру