Суицидтің алдын алу – тек білім беру ұйымдарының немесе құқық қорғау органдарының ғана емес, ең алдымен әрбір отбасының ортақ міндеті. Бала – қоғамның болашағы, ал оның өмірі мен қауіпсіздігі – бәрімізге жүктелген үлкен жауапкершілік.
Қазіргі уақытта балалар мен жасөспірімдер түрлі психологиялық, әлеуметтік және эмоционалдық қиындықтарға жиі тап болады. Оқу жүктемесі, қатарластары арасындағы қарым-қатынас, әлеуметтік желілердің ықпалы, отбасындағы түсініспеушіліктер мен жалғыздық сезімі олардың психологиялық жай-күйіне кері әсер етуі мүмкін. Кей жағдайда бала өз мәселесін ешкімге айта алмай, ішкі күйзелісті жалғыз өткеруге мәжбүр болады.
Сондықтан ата-ананың бала өміріндегі рөлі ерекше маңызды. Баланың материалдық қажеттілігін қамтамасыз ету жеткіліксіз. Ең бастысы – оған мейірім, түсіністік пен қолдау көрсету.
Ата-аналар нені ескеруі керек?
Балаңызбен күн сайын ашық әрі шынайы әңгімелесіңіз.
Оның көңіл күйіндегі өзгерістерге назар аударыңыз.
Өз ойын еркін айтуына мүмкіндік беріңіз.
Сын айтқанда оның жеке басын емес, іс-әрекетін бағалаңыз.
Баланы өзгелермен салыстырмаңыз.
Оның жетістіктерін мақтап, қиын сәттерде жанынан табылыңыз.
Әлеуметтік желілер мен интернеттегі белсенділігін бақылап, қандай ортада жүргеніне мән беріңіз.
Қажет болған жағдайда психолог мамандардың көмегіне жүгінуден тартынбаңыз.
Кейбір белгілер баланың психологиялық көмекке мұқтаж екенін білдіруі мүмкін. Атап айтқанда:
Жалғыз қалуды жиі қалауы;
Көңіл күйінің күрт өзгеруі;
Ұйқы мен тәбетінің бұзылуы;
Өмірге деген қызығушылығының төмендеуі;
Өзін ешкімге қажетсіз сезінетіні туралы айтуы;
Қоштасу сипатындағы сөздер немесе жазбалар қалдыруы.
Мұндай жағдайларда баланың жан дүниесіне бейжай қарамай, онымен ашық сөйлесу аса маңызды. Кейде баланы мұқият тыңдап, оның жанында екеніңізді сезіндіру – ең үлкен көмек болуы мүмкін.
Есіңізде болсын, бала үшін ата-ананың жылы сөзі мен қолдауы кез келген қиындықты еңсеруге күш береді. Баланың жанайқайын дер кезінде байқап, оған қамқорлық таныту – оның өмірін сақтап қалуға себеп болуы мүмкін.
Құрметті ата-аналар!
Балаларыңызға уақыт бөліңіздер. Оларды тыңдаңыздар, түсініңіздер және әрқашан қолдау көрсетіңіздер. Балаңыз қандай жағдайға тап болса да, оның жалғыз емес екенін сезіндіріңіз.
Баланың өмірі – ең қымбат құндылық!
Сырдария ауданы полиция бөлімі ата-аналарды балалардың психологиялық саулығына ерекше көңіл бөлуге шақырады. Бірге әрекет ете отырып, біз өскелең ұрпақтың өмірі мен жарқын болашағын сақтай аламыз.