Қазіргі цифрлық дәуірде интернет алаяқтық қоғам үшін өзекті мәселелердің біріне айналып отыр. Әсіресе жастардың әлеуметтік желілер мен түрлі онлайн платформаларды белсенді қолдануы олардың киберқылмыскерлердің арбауына түсіп қалу қаупін күшейтуде. Осыған байланысты Қызылорда қаласы Полиция басқармасының қызметкерлері жастар арасында құқықтық сауаттылықты арттыру мақсатында Қызылорда жоғары аграрлық колледжінің студенттерімен арнайы кездесу өткізді.
Танымдық әрі профилактикалық бағыттағы іс-шара барысында полицейлер интернет алаяқтықтың кең таралған түрлеріне жан-жақты тоқталды. Студенттерге жалған интернет-дүкендер, банк қызметкерлерінің атынан жасалатын қоңыраулар, әлеуметтік желілер арқылы таралатын күмәнді сілтемелер мен онлайн несие рәсімдеу тәсілдері туралы нақты мысалдар келтіріліп, сақтық шаралары түсіндірілді.
Кездесу барысында құқық қорғау органдарының өкілдері жастар арасында жиі кездесетін буллинг, кибербуллинг және сталкинг мәселелерін де кеңінен қозғады. Мамандардың айтуынша, интернет кеңістігіндегі психологиялық қысым мен қорқыту әрекеттері жасөспірімдердің психологиялық жағдайына айтарлықтай әсер етеді. Сондықтан кез келген қысым көрсету фактісіне бейжай қарамай, дер кезінде ата-аналарға, ұстаздарға немесе құқық қорғау органдарына хабарлау қажеттігі айтылды.
Полицейлер студенттерге жеке мәліметтердің қауіпсіздігін сақтау бойынша нақты кеңестер берді. Атап айтқанда, бейтаныс адамдарға банк картасының деректерін, SMS-кодтарды және жеке ақпараттарды жібермеу, күмәнді сілтемелерге өтпеу, әлеуметтік желідегі парақшаларды қосымша қорғаныс жүйелерімен қорғау қажеттігі ескертілді.
Сонымен қатар жастарға қоғамдық тәртіпті сақтау, құқық бұзушылыққа жол бермеу және заң талаптарын құрметтеу мәселелері де түсіндірілді. Кездесу ашық форматта өтіп, студенттер өздерін толғандырған сұрақтарын қойып, мамандардан нақты жауап алды.
Мамандардың пікірінше, мұндай профилактикалық шаралар жастардың құқықтық мәдениетін қалыптастыруда маңызды рөл атқарады. Өйткені интернет технологиялары дамыған сайын киберқылмыстың да түрлері көбейіп келеді. Сондықтан қоғам болып цифрлық қауіпсіздік мәдениетін қалыптастыру – уақыт талабы.
Іс-шараның басты мақсаты – жастарды интернет кеңістігіндегі қауіптерден сақтандыру, құқықтық сауаттылықты арттыру және қауіпсіз қоғам қалыптастыруға үлес қосу. Осындай кездесулер арқылы жас буынның заңға құрметі артып, қауіпсіздікке деген жауапкершілігі нығая түседі.
Бұл мақаламен бөлісу
Пікір қалдыру
Пікір қалдыру