Өңірде кәмелетке толмағандар арасындағы құқықбұзушылықтың алдын алу, жасөспірімдердің қауіпсіздігін қамтамасыз ету және ата-аналардың жауапкершілігін арттыру мақсатында ұйымдастырылған түнгі рейдтік шаралар жалғасып жатыр. Бастама облыстық білім басқармасының қолдауымен жүзеге асуда.
Кезекті профилактикалық рейдке белсенді ата-аналардан құралған әкелер пулы, білім беру ұйымдарының өкілдері, тәрбие орталығының мамандары және облыстық полиция департаментінің қызметкерлері қатысты. Бірлескен топ түнгі уақытта жастар көп шоғырланатын қоғамдық орындарды, ойын-сауық орталықтарын, компьютерлік клубтарды және басқа да нысандарды аралап, түсіндіру жұмыстарын жүргізді.
Рейд барысында түнгі мезгілде заңды өкілдерінсіз жүрген кәмелетке толмаған жасөспірімдер анықталды. Олардың әрқайсысымен жеке профилактикалық әңгіме жүргізіліп, қауіпсіздік талаптары түсіндірілді. Сонымен қатар ата-аналарға балаларын қараусыз қалдырмау, бос уақытын тиімді ұйымдастыру және олардың жүрген ортасына бақылауды күшейту жөнінде ескерту жасалды.
Мамандардың айтуынша, мұндай шаралардың негізгі мақсаты – жазалау емес, алдын алу. Себебі жасөспірімдердің қараусыз жүруі түрлі келеңсіз жағдайларға, құқықбұзушылыққа немесе өз қауіпсіздігіне қауіп төндіретін оқиғаларға себеп болуы мүмкін.
Бүгінде қоғамдағы тәрбие мәселесінде отбасының рөлі ерекше. Баланың тәртібі мен қауіпсіздігіне ең алдымен ата-ана жауапты. Сондықтан рейдтік шаралар аясында тек жасөспірімдермен ғана емес, олардың ата-аналарымен де кең көлемде профилактикалық жұмыстар жүргізілуде.
Айта кетейік, түнгі рейдтік шаралар өңір аумағында 25 мамырға дейін тұрақты түрде жалғасады. Осы уақыт аралығында құқық қорғау органдары мен сала мамандары қоғамдық тәртіпті бақылап, кәмелетке толмағандардың қауіпсіздігіне қатысты жұмыстарды күшейтпек.
Құзырлы органдар ата-аналарды балалардың бос уақытын назарда ұстауға, олардың түнгі уақытта көшеде қараусыз жүруіне жол бермеуге шақырады. Жасөспірімнің қауіпсіздігі – отбасы мен қоғамның ортақ міндеті.
Бұл мақаламен бөлісу
Пікір қалдыру
Пікір қалдыру