Қазақстан Республикасы Ішкі істер министрлігінде жеке құраммен жүргізілетін идеологиялық және тәрбиелік жұмыстарды жетілдіруге арналған кеңейтілген жиналыс өтті. Іс-шара бейнеконференцбайланыс режимінде ұйымдастырылып, оған еліміздің барлық өңірлеріндегі аумақтық полиция департаменттері, қылмыстық-атқару жүйесі департаменттері, Күзет қызметі, сондай-ақ ІІМ-нің оқу орындарының басшылық құрамы қатысты.
Жиынға Қазақстан Республикасы Ішкі істер министрлігінің Жеке құраммен жұмыс жөніндегі департаментінің бастығы, полиция полковнигі О.С. Мырзабеков төрағалық етті. Кездесу барысында ішкі істер органдары жүйесіндегі кадрлық саясатты жетілдіру, қызметкерлер арасында рухани-адамгершілік құндылықтарды нығайту, сондай-ақ тәртіп пен жауапкершілікті арттыру мәселелері жан-жақты қаралды.
Аталған маңызды басқосуға Қызылорда облысы Полиция департаменті бастығының орынбасары, полиция полковнигі Сейтмұрат Сұлтанбекұлы Туляпов та қатысып, өңірдегі идеологиялық жұмыстың қазіргі ахуалына тоқталды. Сонымен қатар, қала және аудандық полиция бөлімдерінің басшыларына бұл бағыттағы жұмысты жүйелі түрде ұйымдастыру бойынша нақты тапсырмалар жүктеді.
Жиналыс барысында Ішкі істер министрлігінің 2026 жылға арналған идеологиялық жұмыс жоспары кеңінен таныстырылып, оны жүзеге асырудың негізгі бағыттары мен тиімді тетіктері түсіндірілді. Атап айтқанда, жеке құрам арасында патриоттық рухты қалыптастыру, сыбайлас жемқорлыққа қарсы мәдениетті арттыру, қызметтік әдеп нормаларын сақтау, сондай-ақ қоғаммен ашық әрі сенімді байланыс орнату мәселелеріне ерекше мән берілді.
Сондай-ақ, қызметкерлермен жүргізілетін тәрбиелік және моральдық-психологиялық жұмыстарды жаңа деңгейге көтеру қажеттігі айтылды. Бұл ретте ұжымдағы жағымды ахуалды сақтау, қызметкерлердің психологиялық тұрақтылығын нығайту, олардың әлеуметтік жағдайына көңіл бөлу және кәсіби мотивациясын арттыру маңызды бағыттардың бірі ретінде белгіленді.
Жалпы, аталған жиын ішкі істер органдары жүйесіндегі идеологиялық жұмысты жетілдіруге, жеке құрамның кәсіби даярлығы мен рухани әлеуетін күшейтуге бағытталған маңызды алаң болды. Алдағы уақытта бұл бағыттағы жұмыстар барлық деңгейде жалғасып, нақты нәтижеге бағдарланған жүйелі шаралармен жалғасын табады.
Бұл мақаламен бөлісу
Пікір қалдыру
Пікір қалдыру