Сырдария аудандық полиция бөлімінің криминалдық полиция қызметкерлері тұрғындарды велосипед қауіпсіздігіне ерекше мән беруге шақырды. Мамандардың айтуынша, велосипедті аз уақытқа болса да қараусыз қалдыру оның ұрлану қаупін бірнеше есе арттырады. Сондықтан азаматтар жеке мүлкін сақтау мәселесіне жауапкершілікпен қарауы қажет.
Құқық қорғау органдарының мәліметінше, велосипед ұрлығы көбіне иелерінің салғырттығынан орын алады. Ашық жерде бекітусіз қалдырылған немесе түнгі уақытта сыртта тұрған велосипедтер қаскөйлер үшін оңай олжаға айналады. Осыған байланысты полиция қарапайым қауіпсіздік ережелерін сақтауға кеңес береді.
Ең алдымен, велосипедті қысқа уақытқа қалдырған жағдайда да арнайы құлыппен сенімді түрде бекіту қажет. Бұл ұрылардың әрекетін қиындатып, мүлікті қорғауға көмектеседі. Сонымен қатар түнгі мезгілде велосипедті аулада, кіреберіс маңында немесе көшеде қалдырмаған жөн.
Мамандар велосипедтің фотосуретін алдын ала түсіріп, сақтап қоюды да ұсынады. Егер көлік жоғалған жағдайда, оның сыртқы келбеті бойынша іздестіру жұмыстары жеңілдейді. Бұдан бөлек, велосипедтің маркасы, моделі және сериялық нөмірі сияқты маңызды мәліметтерді жазып алып, қауіпсіз жерде сақтау қажет.
Полиция қызметкерлері тұрғындарды аулада, көшеде немесе көпқабатты үйлер маңында күмәнді әрекеттерді байқаса, дереу полицияға хабар беруге шақырады. Уақтылы берілген ақпарат құқық бұзушылықтың алдын алуға және қылмысты жедел ашуға мүмкіндік береді.
Тәртіп сақшыларының айтуынша, қараусыз қалған велосипед – ұрылар үшін ең қолайлы нысанның бірі. Сондықтан әрбір тұрғын қауіпсіздік талаптарын сақтап, өз мүлкіне мұқият болғаны жөн. Азаматтардың қырағылығы мен жауапкершілігі ғана велосипед ұрлығының азаюына ықпал етеді.
Бұл мақаламен бөлісу
Пікір қалдыру
Пікір қалдыру