Премьер-Министр Олжас Бектеновтің төрағалығымен және ғалымдар мен сарапшылардың қатысуымен өткен Үкімет отырысында Қазақстандағы атом энергетикасының перспективасы талқыланды, деп хабарлайды «Азаттық-Ньюс» Ақпараттық агенттігі.

Энергетика министрі Алмасадам Сәтқалиев ел экономикасының өсуімен қатар, өнеркәсіп, металлургия, көлік, IT, фармацевтика және ауыл шаруашылығы өнімдерін қайта өңдеу салаларында электр энергиясына деген сұраныс артып келе жатқанын атап өтті. Оның пікірінше, атом электр стансасының құрылысы энергия тәуелсіздігін қамтамасыз етудің және ескірген қуат көздерін ауыстырудың оңтайлы шешімі саналады.

Сарапшы әрі «Қазақстандық атом электр стансалары» компаниясының басшысы Тимур Жантикин атом электр стансалары ең қауіпсіз әрі ең сенімді энергия көздерінің бірі саналатынын атап өтті. Оның айтуынша, Қазақстанның болашағы атом энергетикасымен тығыз байланысты. Жүргізілген зерттеулерден кейін, апаттық жағдайлардың пайда болу қаупін азайтатын бірнеше қауіпсіздік жүйелері бар III және III+ буындардың су-сулы реакторлары ең қолайлысы ретінде таңдалды.

«Ядролық физика институты» РМК бас директоры Саябек Сахиев атом саласына қажет мамандар даярлау және халықаралық ынтымақтастықты дамыту туралы сөз қозғады. Оның айтуынша, МАГАТЭ және шетелдік серіктестердің қолдауымен үш оқу орталығы жұмыс істейді, онда Қазақстанның атом саласы үшін 5 мыңнан астам маман даярланды. Сахиев атом энергетикасын дамыту қадамы елімізде жоғары білікті кадрларды даярлауға және ғылым саласының дамуын ынталандыруға мүмкіндік беретінін атап өтті.

Талқылау қорытындысы бойынша Энергетика министрі республикалық референдум өткізу туралы қаулы жобасын қарауға енгізуді ұсынды. Премьер-Министр Энергетика министрлігі мен Үкімет Аппаратына Президент әкімшілігіне ұсыну үшін Жарлық жобасын дайындауды тапсырды.